Riotorto vive mañá a festa da forxa co traballo en vivo de diversos artesáns

---

12/04/2014 - Isabel García / El Progreso (Riotorto)

A localidade riotortense renderá mañá tributo, por oitavo ano consecutivo, o produto que mellor identifica a este pequeno pobo do interior lucense: o ferro. O casco urbano das Rodrigas vaise converter nun escaparate cheo de carpas, nas que se poderá admirar, ó longo do día, o labor de quince ferreiros locais, galegos e mesmo austríacos. Tamén haberá un cento de expositores de varios tipos de artesanía, dende a pratería á curtiduría e á alfarería.
«Ata os máis pequenos poderán bater na forxa cos obradoiros infantís que impartirá o austríaco, afincado nos Oscos, Friedrich Bramsteidl», sinala un dos organizadores Ángel Villada, provinte dunha familia dedicada, xeración tras xeración, a este labor: «Aparte dos dez ferreiros que aínda están en activo en Riotorto -entre eles, o seu sobriño de 31 anos, especializado no deseño de pezas de ferro artísticas e de decoración-, vanse poder ver os traballos doutros que veñen do Corgo, Guntín, A Fonsagrada e mesmo de Santiago, como é o caso de Alberto Leis».

ATRACTIVOS
Estarán presentes a olería de Buño e as gaitas de Seivane

O alcalde de Riotorto, Federico Gutiérrez, inaugurará a feira, ás doce do mediodía, xunto cun representante da área de cultura da Deputación de Lugo, que poderá ser o propio vicepresidente, Antonio Veiga, ou Mario Outeiro, xa que o ente provincial sufraga o evento. Ademais da forxa haberá obradoiros de torneado de madeira a cargo de Jesús Iglesias de Ortigueira e de talla, con Roberto Figueira de Rianxo; de olería de Buño e de carbón vexetal, cos carboeiros de Baralla.

Fuente:  elprogreso